Kommunepsykologtenesta rettar seg mot vaksne, born og unge med psykiske vanskar, som har behov for kortvarig psykisk helsehjelp (1-5 timar).
Tenesta vil vidare ha fokus på å gje psykisk helsehjelp til barn og unge som er i risiko for å utvikle psykiske lidingar, til dømes ved reaksjonar på kriser eller belastningar.
Kommunepsykologen skal vere eit lågterskeltilbod med fokus på førebygging og meistring. Psykologen har teieplikt.
Kommunepsykologen er også tilgjengelig for tilsette i barnehage, skule eller helseteneste som ynskjer kompetanseheving eller innspel på pedagogiske opplegg knytt til psykisk helse.
Psykologen snakkar norsk, engelsk og tysk.
Slik kjem du i kontakt med kommunepsykologen
- Du sjølv, lege, helsesjukepleiar, tilsette i barnehage og skule eller andre kan ringe på telefon 469 33 658
- Du sjølv, lege, helsesjukepleiar, tilsette i barnehage og skule eller andre kan fylle ut tilvisingsskjema og sende det til: Kommunepsykologtenesta, Taklegarden 1, 6924 Hardbakke
Tilvisingsskjema for barn og unge under 16 år (PDF, 355 kB)
Tilvisingsskjema for personar over 16 år (PDF, 356 kB)
Born og unge må ha samtykke frå begge foreldra/føresette for tilvising.
Tenesta kan kontaktast kva tid som helst i arbeidstida, og tilbodet er gratis
Saksgang og klage
Dersom det kan vere aktuelt med eit tilbod, får du får fyst éin vurderingssamtale for å vurdere kva som er rett tilbod. Dersom vidare oppfølging hjå psykolog er rett, vert du beden om å ta ei somatisk undersøking av lege før vidare oppfølging vert gitt. Dette er ikkje nødvendig dersom tilvising kjem frå lege og somatisk undersøking er gjort før vurderingssamtalen.
Dersom du ikkje får tilbod og er ueinig i avgjerda eller ikkje er fornøyd med tilbodet du har fått, har du rett til å klage.
Kommunepsykologen er ein del av kommunen si førebyggande og behandlande helseteneste, og held til på Solund Helsetun. Gjennom tidleg inngripen ynskjer kommunen å førebygge at psykiske lidingar veks seg store. Målet for kommunepsykologen er å tilby tidleg hjelp for å unngå at vanskane blir større.
Det fins mykje god hjelp å få andre plassar også, til dømes over internett.
Her kan du finne ei oversikt over gode nettstader som psykologen anbefalar. (PDF, 468 kB)
Her ligg tips til barn og vaksne i alle aldrar, og med ei rekke ulike problemstillingar.
Psykologen tilbyr samtalar for born og ungdom med milde til moderate psykiske vanskar som til dømes angst/bekymringar, depresjon, låg sjølvkjensle, reaksjon på skremmande opplevingar og samspelvanskar. For barn inneber det i stor grad samtalar og samarbeid med dykk som føresette. I direkte arbeid med born vert ofte teikning, plastelina eller leikefigurar nytta.
Psykologen samarbeider med andre når det er aktuelt og føresette ynsker det. Dette kan vere helsesjukepleiarar, PPT, BUP, skule, barnehage eller andre. Her finn du meir informasjon om psykologtenesta til born og unge. (PDF, 169 kB)
Tilbodet eignar seg for menneske som har milde til moderate psykiske plager som til dømes angst/bekymringar, depresjon, relasjonsvanskar eller anna og som ikkje allereie har eit behandlingstilbod.
Avgrensing
- Utgreiing av lærevanskar eller tilpassing i barnehage og skule skal til PPT, Pedagogisk Psykologisk Teneste.
- Personar som har krav på hjelp etter lov om spesialisthelsetenester skal tilvisast BUP (barn) eller DPS (vaksne) for oppfølging.
- Akutte psykiske lidingar og helseproblem blir ikkje handtert av kommunepsykologen, men av fastlege/legevakt
Lovverk:
Pasient- og brukarrettigheitslova
Helse- og omsorgstenestelova
Helsepersonellova
Forvaltningslova