Dispensasjon

Dersom du vil bygge eller føre opp noko som er i strid med lov, forskrift eller plan, må du søke om dispensasjon. Kommunen kan gje varig eller mellombels dispensasjon frå føresegner gjeve i eller i medhald av plan- og bygningslova § 19-2.

Vilkåra for å gje dispensasjon er:

Omsyna bak føresegna det blir søkt dispensasjon frå kan ikkje bli satt vesentleg til sides
I tillegg må fordelane ved å gje dispensasjon vere klart større enn ulempene

Det er søkar sitt ansvar å grunngje kvifor kommunen skal gje dispensasjon.

Kommunen kan ikkje gje dispensasjon frå reglane om sakshandsaming. Du kan heller ikkje få svar på utfallet av ein dispensasjon før den er handsama av kommunen.

Er du i tvil om det du skal bygge krev dispensasjon kan du sende oss ein e-post til post@solund.kommune.no
Dersom det er avtale førehandskonferanse er dispensasjon eit naturleg tema å ta opp der.

Eksmpel på dispensasjon

Plassering av bygning er i strid med regulert byggegrense
Bygging i strid med arealføremålet landbruk-, natur og friluftsområde (LNF)
Bygging nær veg
Tilbygg eller byggverk nærare nabogrense enn 4 meter
Bygningen vert høgare enn krav i arealplan
Utnyttingsgrada for eigedomen vert overskriden
Bygningen eller tiltak nær sjø eller vassdrag

Korleis søke om dispensasjon

Du kan søke om dispensasjon saman med byggesøknad, eller som eigen søknad. Søknad om dispensasjon skal vere grunngjeven på eige skriv. Du må og nabovarsle at du søker om dispensasjon.

Dispensasjon må vere grunngjeve og du skriv det som eit brev. Du må skrive kva du søker dispensasjon frå, og kvifor du bør få det.
Ta gjerne med fordelar og ulemper som følgjer av dispensasjonen.
Dispensasjon må bli nabovarsla slik som vanleg byggesøknad. Du kan gjerne søke dispensajon samstundes med byggesøknaden.
Dersom du søker om dispensasjon utan byggesøknad bør du legge ved ei enklare teikning og situasjonskart som illustrerer kva du vil gjere.
Vi må ha kvittering på at nabovarsel er mottatt.

Dersom det er eit større og komplisert byggetiltak bør du søke om dispensasjon som eigen søknad. Dersom du ikkje får innvilga dispensasjon har du då ikkje brukt tid og pengar på å engasjere eventuelle føretak og arbeid for søknaden.

Dersom byggetiltaket treng dispensasjon frå fleire føresegner søker ein om dette i same søknad. I søknaden bør ein vere tydeleg på kva ein søker dispensasjon frå.

Bygging langs kommunal veg

Om du skal bygge hus, bod, garasje, mur, trapp eller anna fast konstruksjon nærmare enn 15 meter frå senterlinja til kommunal veg, må du søke om dispensasjon. Dette gjeld dersom eigedomen din ikkje har ei regulert byggegrense i gjeldande plan.

Slik søker du
For å søke om dispensasjon langs kommunal veg kan du bruke det elektroniske søknadskjemaet på heimesida til Statens vegvesen. Du finn meir informasjon og søknadsskjemaet her

For at søknaden skal bli handsama må den innehalde:

Ei skildring av det du skal bygge
Situasjonskart som viser plasseringa av tiltaket. Teikn ei målsatt linje frå det du skal bygge til midten av vegen
Dersom tiltaket vil påverke sikt i ei avkøyrsle eller langs vegen må du teikne inn frisikt i avkøyrsla

Pris

Søknad om dispensasjon kan du sende på e-post til post@solund.kommune.no
Du kan óg levere søknaden i resepsjonen på kommunehuset, eller sende den i posten til:

Solund kommune
Hardbakke 26
6924 Hardbakke

Publisert 18.05.2022 13.00

Sist endra 03.08.2023 10.16